Nase dia 7 di Dezèmber di aña 1946

Kon (na ki edat) a kuminsá ku deporte

For di mucha chikitu Emily a lanta ta mira su tionan i primunan ta praktiká deporte i na skol e la praktiká diferente deporte manera entre otro pinpòn, basketbòl i vòlibòl. Despues ku Emily a kita for di skol e la bin praktiká e deporte di Tènis i Bowling ku mas seriedat. Pero tabata den e deporte di Bowling ku e la resaltá mas, tantu lokal komo internashonal.

Kua tabata logronan di mas grandi den deporte

Un di e logronan mas grandi pa Emily De Jognh Elhage tabata durante di e promé torneo internashonal ku e la partisipá na dje, e la gana e premio amistat, kual a keda skohe a base di votashon di e propio partisipantenan. E echo di por a sera konosí ku diferente hende i keda den kontakto ku nan t algu sumamente bunita. Partisipashon na diferente kampionato mundial representando Antia.

Kua tabata e entrenadó, deportista i o dirigente ku mas impakto

E persona ku a hasi hopi impakto den bida di Emily ta su propio ruman Philip “Lipo” Elhage. Aunke Lipo ta mas chikí ku Emily, semper e tabata sobresalí pa su konosementu i su forma di ta i di komportá. Lipo no ta unikamente un ruman, pero e ta un konsehero pa Emily.

Kua tabata e desepshon di mas grandi den deporte

Emily no ta kere ku e tabatin desepshon den su trayektoria deportivo. Un momentu kisas ménos agradabel tabata durante di un torneo ku nan a partisipá na dje na Colombia i e sapatunan plùs e balanan ku nan mester a hunga kuné, no a yega Colombia i nan mester a uza bala plùs sapatu di e pais anfitrion. Pero for di e torneo aki e la sera un kantidat di amistat.

Kua tabata e satisfakshon di mas grandi den deporte

Semper Emily a purba di hasi tur loke tabata na su alkanse pa deporte. Emily ta konsiente ku den su temporada e la haña oportunidat di biaha rònt mundu pa representá su pais. Tantu di parti e gobièrnu di e époka ei, komo sektor priva a yuda en grandi pa e por a biaha sin niun problema. P’esei e ke pa esaki ta e kaso tambe ku nos deportistanan di aktualidat.

Un konseho na nos hubentut pa loke ta deporte

Tur hende mester haña e oportunidat di praktiká deporte i mester hinka esaki huntu ku skol. No ta tur hende lo por bira un Andruw Jones òf un Churandy Martina, pero nan mester por haña e oportunidat di a lo ménos purba. Deporte semper a demostrá ku e ta hasi bu e hende ehemplar ku bo mester den bo komunidat.