Frank Curiel

Frank Curiel

Nase dia 6 di Yüli di aña 1945

Kon (na ki edat) a kuminsá ku deporte

Na edat di 18 aña Frank Curiel a kuminsá praktiká e deporte di beisbòl, pero debí ku e no por a partisipá den e kategoria di 17 aña, e mes a disidí di lanta un tim i a fungi komo mènedjer i hungadó. E tabata den Santa Maria Giants ku a bira Sta. Maria Pirates hungando komo lèft filder i mas despues picher relevo.

Kua tabata logronan di mas grandi den deporte

Na aña 1977, despues ku Frank a biaha pa Pto Riko i a mira for di ki edat e muchanan tabata hunga beisbòl, ora e la bolbe bek Kòrsou a disidí di lanta e liga vruminga aki na Kòrsou i na 1980 a lanta e liga wimpiri. Frank a logra yega Williamsport ku e selekshon di little league Kòrsou na 1980, despues na 2004 ku e selekshon di Kòrsou a bira kampion mundial di little league i e echo ku Jonathan Schoop a subi den liga grandi ku Baltimore Orioles.

Kua tabata e entrenadó, deportista i o dirigente ku mas impakto

Esnan ku a hasi un impakto den bida di Frank Curiel ta Sr Cornelia, Tio Daou, Eddy Daou, Ernest Smith i Enchi Jansen, tur di felis memoria. E tempu aya Frank tabata puntra hopi i asina e la implementá e eksperensia riba tereno ku su muchanan.

Kua tabata e desepshon di mas grandi den deporte

E desepshon di mas grandi paFrank Curiel ta e echo ku a ser SEDREKO. Pa Frank e seramentu di SEDREKO ta meskos ku nan a kibra su man i pianan.

Kua tabata e satisfakshon di mas grandi den deporte

Satisfakshon di mas grandi pa Frank ta ku e la logra ku e organisashon di beisbòl, ta konsistí di tur divishon. For di mucha di 4 aña te ku esnan ku ta hunga dòbel A.

Un konseho na nos hubentut pa loke ta deporte

Práktika deporte i respetá bo dirigentenan. Bo mester tin gana di superá bo mes, no hasi deporte pa komplasé niun hende. Hasi deporte for di fondo di bo kurason semper ku disiplina i rèspèt na promé lugá.