Nase dia 21 di Novèmber di aña 1949

Kon (na ki edat) a kuminsá ku deporte

For di chikí Fraklin a kuminsá ku futbòl i a práktika tambe vòlibòl, beisbòl, basketbòl, pinpòn i natashon. Pero esun ku mas Franklin a destaká den dje tabata pinpòn (tènis di mesa) i despues ta bai Hulanda pa sigui desaroyá den e deporte. Estando na Hulanda i biahando pa diferente parti di Oropa, Franklin ta bin kuminsá kana ku e deseo pa drenta den e mundu di atministrashon deportivo. Su deseo tabata pa yuda e desaroyo di e deporte di pinpòn na Kòrsou i a hasi esaki tambe ku hopi éksito.

Kua tabata logronan di mas grandi den deporte

E logro di mas grandi pa Franklin Mathilda ta komo dirigente, ora ku e la drenta direktiva di federashon di pinpòn i e deporte tabata pasando den un mal momentu pero Franklin a logra traha 3 akomodashon pa por praktiká pinpòn (Muizenberg, Santa Maria i Santa Rosa) i a organisá e promé kampionato di pinpòn di Karibe, esun di mas grandi ku nunka anterior a ser organisá, den kua 23 pais a partisipá na aña 1989. Despues e la organisá un kampionato sur amerikano na Kòrsou kual tabata sumamente eksitoso i asina pone pinpòn bèk riba pia. Meskos Franklin Mathilda ta e persona tambe ku a lanta salon di fama na Kòrsou.

Kua tabata e entrenadó, deportista i o dirigente ku mas impakto

Komo deportista un di e personanan ku a hasi hopi impakto den bida di Franklin Mathilda ta Robert Hose kende ta un di e mihó hungadónan di pinpòn ku Kòrsou a konosé.

Kua tabata e desepshon di mas grandi den deporte

Franklin su desepshon di mas grandi tabata na Hulanda, durante ku e tabata atendé e ‘trainingscamp’ ku federashon di pinpòn a mand’e. Na Hulanda Franklin tabata práktika diferente deporte den su ora liber ku e tro studiantenan, manera entre otro Vòlibòl, Basketbòl i Natashon. Grandi tabata su sorpresa ku na su evaluashon, esnan na kabes, a splik’e ku e tin bon talento pa práktika deporte, pero ménos pa hunga pinpòn, kual ta e deporte ku e netamente e la bai pa práktika na Hulanda. Esaki a pone ku e mester a kambia su sistema di hunga i den 3 siman a dominá e sistema kompletu

Kua tabata e satisfakshon di mas grandi den deporte

E satisfakshon di mas grandi pa Franklin Mathilda tabata di por a yuda e deporte di pinpòn tantu lokal komo internashonalmente i ku ainda e ta haña rekonosementu pa esaki. Meskos ta e echo di a lanta e salon di fama ku awe tur hende por keda rekordá nos baluartenan di deporte.

Un konseho na nos hubentut pa loke ta deporte

Aparte di estudio, no tin nada mas mihó ku hasi deporte segun Franklin Mathilda. Deporte ta yuda bu físikamente, e ta yuda bu den bo salú i e ta brinda bu hopi oportunidat den bida.