Nasé dia 25 di Ougùstùs di aña 1955

Kon (na ki edat) a kuminsá ku deporte

Pa straño ku ta parse Taffy a kuminsá hunga futbòl na Asiento serka dr. David ku 6 pa 7 aña. Ku 13 aña Taffy a kuminsá hunga bala banda di kas ku Ramiro Duberau i algun amigu mas i ku 14 aña Taffy a drenta un tim. Despues nan a lanta un tim ku defuntu Ernest Smith, Cecil Garcia, Zef Flemming, Herbert Bulo, Lucien Oehlers, Chape Berardus, Henry Bernardus, Nelson Gutierrez hopi di e muchanan di bario. Ku apenas 17 aña Taffy, a logra kai den selekshon di Kòrsou huntu ku defuntu Willie Pietersz, Antonio Keller, Henry Jones, Raffy Josefa i e otro mihó hungadónan di Kòrsou. Pa loke ta su historia komo entrenadó, ta asina ku na 1972/73 Taffy a konosé Zenaida Geerman. Zenaida a bisa Taffy ku nan tin un tim na Buena Vista ei i si e ta deseá pa trein e muchanan. Taffy tabata treinnan na skol tambe. Na desèmber di aña 73 Taffy ku Chape (Chape Bernardus) a disidi di pasa Buena Vista tira un bista riba e galiñanan ei promé ku nan bai Punda. Taffy i Chape a bati bala duna e muchanan algu di gemnastik. Asina Taffy a djòin e ekipo di Pichingolo na 73.

Kua tabata logronan di mas grandi den deporte

Komo pelotero tabata e echo di por a kai den selekshon na un edat yòn i komo dirigente di beisbòl, di por a bira kampion ku e ekipo di Wild Cats, na edat di 21 aña (Un rèkert ku te ainda ta vigente). Un logro komo dirigente di sòftbòl, ku te ku awe ta algu insolito pa Taffy, ta e echo ku nan a sali kampion sentro amerikano i di Karibe den kategoria U19 ku apénas 9 hungadó na Bahamas. Taffy ta konsiderá ku ta Dios tabata ku nan i a logra e título aki. Ku Pichingolo Taffy a logra partisipá na praktikamente tur final di e kampionato i a konkista mas ku 30 título komo kampion di Kòrsou

Kua tabata e entrenadó, deportista i o dirigente ku mas impakto

Sigur esnan ku a hasi impakto den Taffy su karera komo deportista i entrenadó tabata Ernest Smith i Mona Cornelia a nan forma di traha duru i ku dedikashon.

Kua tabata e desepshon di mas grandi den deporte

Taffy su desepshon di mas grandi ta e echo ku trahando pa un kousa bon i pa un kousa sano, tòg bo ta haña bu ku kalumnia i hendenan ku ta papia malu di bo siendo ku nan no tin informashon.

Kua tabata e satisfakshon di mas grandi den deporte

Sigur un di e satisfakshonnan di mas grandi ta e echo di por tabata 40 aña den final ku Pichingolo, pero mas ku tur kos ta e hóbennan ku bo ta yuda den nan desaroyo i ku nan ta brinda bu e rèspèt. Taffy te ku awe ta kòrda un bia ku e la bai ku e ekipo di Pichingolo Hulanda i algun eks hungadó di Pichigolo ku ta na Hulanda a sorprendé Taffy ku un opsekio ku sigur e tin pa sèmper den kurason.

Un konseho na nos hubentut pa loke ta deporte

Taffy su konseho na nos hubentut ta ku si bo ta hasi deporte, trein duru, trein serio, kòrda sosegá bo kurpa ora bo tin ku bai kompetí. Kòrda semper ku bo tin ku siña i hasi bo bèst na skol.