Nase dia 21 di Yüli di aña 1940

Kon (na ki edat) a kuminsá ku deporte

Harold Laurens a práktika basta deporte na mucha, pero a kuminsá ku deporte di body-building na aña 1957 i despues a praktiká diferente deporte di arte marsial na nivel haltu. Tabata na aña 1982 ku Harold ta bira hues i rèfri di bòkseo internashonal i aki ta start un karera impreshonante komo hues i rèfri di bòkseo.

Kua tabata logronan di mas grandi den deporte

E logro di mas grandi pa Harold Laurens ta komo rèfri di bòkseo. Esaki tabata di por a fungi komo rèfri di e kombate pa título mundial entre e kampion mehikano Edgar Sosa i e retadó filipino Juanito Rubial (WBC World light flyweight title). E pelea aki a tuma lugá na aña 2008 den ‘Arena de Mexico’ situá na e distrito federal di Méhiko i ku tin un kapasidat enorme pa akapará hende.  Aparte di e pelea aki Harold Laurens tabata hues na hopi pelea internashonal di boksdonan di renombre manera entre otro Julio Cesar Chavez, Erik Morales, Miguel Cotto i Floyd Mayweather

Kua tabata e entrenadó, deportista i o dirigente ku mas impakto

Tabatin diferente persona ku a yuda Harold Laurens den su desaroyo pero e ta gradesido na Dios ku a dun’e e talento di por a logra tur lokual e la logra komo deportista i prinsipalmente komo hues i rèfri di bòkseo.

Kua tabata e desepshon di mas grandi den deporte

E desepshon di mas grandi ta e echo ku esnan ku a yud’e pa e por a bira un rèfri internashonal, despues a buska moda di kibr’e. Pero Harold a sigui lucha i a sa di marka historia komo rèfri i hues di Bòkseo

Kua tabata e satisfakshon di mas grandi den deporte

E satisfakshon di mas grandi pa Harold Laurens ta di por a logra tur lokual e la logra despues di a pone su meta i ta sumamente orguyoso di tur lokual e la logra.

Un konseho na nos hubentut pa loke ta deporte

E konseho di Harold Laurens na nos hubentut ta pa kual sea e deporte ku bo skohe, ta ku trabou duru so bo ta logra, no ta nada fásil. No pretendé ku bo sa tur kos, pero tende di bo entrenadó i analisá. Pone un meta bo dilanti i bisa ku bo tin ku yega esaki i einan bo ta logra tur kos.