Nasé 11 di Yüli di aña 1941

Kon (na ki edat) a kuminsá ku deporte

Na edat di 11 aña Henry a kuminsá ku hisamentu di peso, ora ku e tabata warda ora ku su rumannan no tabata na kas pa e praktiká e deporte di hisamentu di peso. Na hopi okashon Henry a sali Mr. Curaçao den e deporte di body-building. Henry a kuminsá praktiká karate debí ku den e bukinan di body-building, nan tabata ilustrá algun instrukshon di e deporte di karate riba e último paginá. Na aña 1975 Henry ta biaha pa promé bia pa mundial di karate. Pues na edat grandi Henry a drenta den e mundu di karate.

Kua tabata logronan di mas grandi den deporte

E logro di mas grandi pa Henry ta e kantidat di bia nan ku e la gana e kampionato di body-building na Kòrsou i alabes e míles di muchanan ku a siña karate serka dje. Henry ta e representante di e sekshon di Karibe pa loke ta e federashon mas grandi di karate na mundu

 Kua tabata e entrenadó, deportista i o dirigente ku mas impakto

Manera Henry a splika, den e deporte di karate e la siña riba su mes, pero pa loke ta su desaroyo den e deporte aki, e ta hopi gradesido na Shihan Rios di Puerto Riko, meskos Shihan Nakamura di New York i Shihan Oyama ku hasi hopi impakto riba dje. Den e parti di hisamentu di peso Marcel Betrian a yud’é hopi tambe.

Kua tabata e desepshon di mas grandi den deporte

E desepshon di mas grandi pa Henry ta e kantidat grandi di atletanan ku e la hiba mundial i hopi ku e la siña nan praktiká e deporte di karate, awe niun no konosé Henry mas. Esaki ta algu ku semper a duel Henry masha hopi mes.

Kua tabata e satisfakshon di mas grandi den deporte

Un di e satisfakshon di mas grandi pa Henry ta di por a logra un kantidat di título komo Mr. Curaçao, pero e satisfakshon muchu mas grandi di tur ta e echo di por a siña míles di hende e deporte di karate.

Un konseho na nos hubentut pa loke ta deporte

Henry su konseho ta pa hóbennan praktiká karate for di nan 4 aña, paso karate no ta simplemente e bringamentu, pero karate ta un disiplina general ku ta forma e mucha den tur sentido, tantu físikamente , mentalmente i spiritualmente.