Imro van Wilgen
Nasé 23 di Novèmber di aña 1942
Kon (na ki edat) a kuminsá ku deporte?
Na edat di 13 aña Imro van Wilgen a start ku e deporte di beisbòl den bario. Tabata Guillermo Rosario ku a organisá un kompetensia di beisbòl den bario ku e tabata yama olimpiada di beisbòl i Imro huntu ku algun amigu ta sera kabes huntu pa forma un ekipo (Cas Corrá Lions-Curaçao) i partisipá na e torneo aki. Despues e la bai studia na Hulanda i a sigui praktiká e deporte di beisbòl huntu ku entre otro Frank Evertsz, Yubi Evertsz i Mario Evertsz, komo e hungadónan prinsipal den e ekipo di SV ROBUR-Apeldoorn, pero e no a hasi esaki ku e mesun intensidat ku e tabata hasié na Kòrsou.
Kua tabata logronan di mas grandi den deporte
Komo dirigente e la bira sekretario di FeBeKo ku su 28 aña. Na 2001 e ta bira miembro di e direktiva di komité olímpiko di Antia. Na 2005 e ta ser skohé komo sekretario general di e organismo menshoná i pa 12 aña largu Imro a fungi komo dirigente di komité olímpiko di Antia.
Formashon Deportivo
-Sports Management Nederlandse Sport Federatie
-Sport Management International Olympic Committee
Aktividat Deportivo
1955-1958: Baseball nivel hubenil komo hungadó di Cas Corrá Lions-Curaçao
1959-1963: Baseball Overgangsklasse komo hungadó di SV ROBUR-Apeldoorn/Hulanda.
1960-1963: Hungado di SV Rapid (volleybal ) Velp/Gelderland
1963-1970: Hungado aktivo(nivel A klasse) i Secretario:BBC Cas Corra Lions
1975-1979: Secretario Curacaose Sport Federatie
1972-1988: Secretario BBC Groot Kwartier Stars
1972-1990: Secretario Curaçao Baseball Association(FEBEKO)
1975-1990: Secretario di NABAFE (Nederlands Antilliaanse Baseball Federatie)
2001-2005: Miembro di direktiva di NAOC(Nederlands Antilliaans Olympisch Comité)
2005-2012: Sekretario General di NAOC (Nederlands Antilliaans Olympisch Comité)
2005-2010: Dosente Olympic Academy International
Miembro di honor
1979: Curacaose Sport Federatie(CSF)
1999: Federashon di Baeball di Kórsou (Febeko)
Kua tabata e entrenadó, deportista i o dirigente ku mas impakto
Komo mucha i un hende ku ta stima beisbòl, Imro a ser influensiá hopi pa peloteronan di beisbòl. Un di esnan ku a influensia Imro tabata Cafenol Reiter, ku tabata un kècher mes kos kuné i ku tabata militá den e ekipo di Lucky Strike. Cafenol ta un di e esnan ku a siña Imro hopi komo pelotero. Otro ku tabata importante i ku Imro tabata atmirá mashá hopi mes komo pelotero tabata Chikitin Gregorius.
Kua tabata e desepshon di mas grandi den deporte
Un di e desepshonnan di mas grandi pa Imro tabata e echo ku na momentu ku e mester a bai Hulanda bai studia, e no por a hunga beisbòl tur dia manera tabata e kaso na Kòrsou. Su di dos desepshon di mas grandi tabata dia ku nan a pèrdè kontra Blue Hawks i no por a subi pa AA i e aña despues, durante di un enkuentro Imro ta kai i ta saka su brasa for di lugá, kual a kibra su karera komo pelotero. Tabata akinan ku e la sigui komo dirigente den deporte.
Kua tabata e satisfakshon di mas grandi den deporte
Un di e satisfakshonnan di mas grandi tabata e echo ku e por a desaroyá komo dirigente atministrativo i esaki for di 18 aña e tabata sekretario di e ekipo di beisbòl ku nan mes a lanta aki na Kòrsou. Despues ta sigui e satisfakshon di por tabata sekretario di FeBeKo. Otro logro importante pa Imro ta dia ku e la ser skohe komo sekretario general di Komité Olímpiko di Antia, kual funshon e la ehersé pa 12 aña
Un konseho na nos hubentut pa loke ta deporte
Komo deportista nunka no keda kontentu ku prestashon mediokre. Hasi bo máksimo esfuerso pa bo logra e máksimo i hasi esaki tambe bo estilo di bida. Ora bo hasi un kos, hasié bon i hasi lo mihó!