Nase dia 8 di Yanüari di aña 1952

Kon (na ki edat) a kuminsá ku deporte

Tur Lipo su rumannan i su primunan tabata hunga beisbòl i su Tio tabata mènedjer di e ekipo, ku tabata hunga riba un tereno na Sta. Rosa ku nan mes a limpia. Ku 11 pa 12 aña Lipo tabata bai vèlt pa piki bala i tabata tira bala ku nan. Ku su 14 aña Lipo a bai hunga den klase A i ku su 16 aña e la kuminsá den AA huntu ku Kolo Marie i Humprey Fransisca. Nan 3 a promové huntu a AA. Lipo a hunga te na aña 1992. Na 1983 e la bira mènedjer/hungadó di e ekipo di Sta Rosa Mennen i a keda nombrá tambe komo mènedjer di selekshon di Antias. Na 1990 e la stòp ku selekshon na momentu ku e la bira direktor di SEDREKO.

Kua tabata logronan di mas grandi den deporte

Un logro komo pelotero tabata un ‘homerun’ ku e la bati na Cuba na aña 1982, den weganan ‘Centro Americano y del Caribe’ pa gana di Puerto Riko i pa despues logra medaya di bròns. Tabata pa promé bia den historia di Antia, ku nan ta logra un medaya den weganan ‘Centro Americano y del Caribe’ pa loke ta beisbol. Komo mènedjer tabata na 1986, na Sto Domingo, ora ku Antia ta logra medaya di plata, kedando tras di Cuba den weganan ‘Centro Americano y del Caribe’.

Kua tabata e entrenadó, deportista i o dirigente ku mas impakto

Tio Daou tabatin un impakto grandi den Lipo su bida, mirando ku e tabata esun ku a duna Lipo, Lipo su promé unifòrm komo ‘batboy’. Ta Tio Daou tabata bin buska Lipo pa bai vèlt i tabata tira bala ku Lipo. Sigur a sigui algun dirigente despues ku a yuda den e desaroyo i a forma Lipo komo un pelotero kompletu.

Kua tabata e desepshon di mas grandi den deporte

Lipo no por bisa ku e tabatin desepshon, ku eksepshon di un bala ku nan a dal e na su man i esaki a kibra su man, pero den su turno siguiente e la konektá un ‘homerun’ (Ounke ku basta doló)i despues e la haña sa ku su man tabata kibrá.

Kua tabata e satisfakshon di mas grandi den deporte

Su satisfakshon tabata semper ora ku gana. E punto tabata pa bo duna shen porshento i sòru semper pa bo hunga pa bo ekipo gana.

Un konseho na nos hubentut pa loke ta deporte

Si bo ta hasi deporte hasié ku honor i ku smak i ku dedikashon. Mester strès riba e disiplina, soru pa bo ta na ora, sòru pa bo skucha bo coach, sòru pa bo ehekutá loke bo coach ta bisa. Kaminda bo ta mira ku algu a bai robes, purba semper pa e bai mihó, hasi lo máksimo pa purba drech’é.