Nase dia 9 di dezèmber di aña 1927

Kon (na ki edat) a kuminsá ku deporte

For di mucha chikí Pedro no tabata para ketu i tabata gusta hunga bala. Komo ku su tata a fayesé promé ku e nanse i su mama tambe ta fayesé ora ku e tabatin 6 aña, su famianan ta intern’é na Scherpenheuvel. Akinan serka frater Tharasius ku 15 aña su karera komo futbolista a haña forma i ta drenta e ekipo di Jong Holland, ounke ku su deseo tabata di bai e ekipo di SUBT serka Antoine Maduro. Na edat mas grandi Pedro a drenta den beisbòl i a lanta e ekipo di beisbòl Marchena Braves.

Kua tabata logronan di mas grandi den deporte

E logronan di Pedro Matrona tabata diferente, entre otro e la gana kampionato di Kòrsou ku e ekipo di Jong Holland i a forma parti di e selekshon di Kòrsou for di 1946, pa un tempu largu i semper tabata e kapitan di nos selekshon nashonal. Nan tabatin diferente resultado den weganan Panamericano logrando medaya di oro. Meskos na aña 1950 Pedro a keda selektá huntu ku Ergilio Hato, pa a reforsá e ekipo di Feyenoord na Hulanda i a hunga diferente enkuentro kontra ekiponan grandi. Komo dirigente di beisbòl Pedro a yuda ku konstrukshon di e muizenberg ballpark i despues a drenta arbitrahe di little league i asta a bira presidente di e èmpayernan.

Kua tabata e entrenadó, deportista i o dirigente ku mas impakto

Frater Tharasius i Dr Antoine Maduro a hasi hopi impakto den bida di Pedro Matrona. Pedro tabata konsiderá Antoine Maduro komo un sabio i tabata ke imitá Dr Antoine Maduro riba tereno di futbòl.

Kua tabata e desepshon di mas grandi den deporte

E desepshon di Pedro Matrona ta e echo ku kasi e no ta ser rekonosé pa federashon komo un di nos baluartenan i fuera di esaki ta e echo ku nos nivel di futbòl lokal a bai hopi atras. E ta kòrda tur e logronan ku Kòrsou tabatin komo selekshon i tambe komo ekiponan lokal i aktualmente nos no ta konta mas den region.

Kua tabata e satisfakshon di mas grandi den deporte

Pedro Matrona ta konsiderá e echo ku e por a biaha na diferente parti di mundu i di por a yuda semper den deporte, komo e satisfakshon di mas grandi pe. Otro satisfakshon grandi pa Pedro ta e echo ku Mordy Maduro a hib’e Suesia, pa presensia un mundial, tabata algu ku nunka mas e por a lubidá. E la mira Pele hunga su promé wega den mundial.

Un konseho na nos hubentut pa loke ta deporte

Mester praktiká deporte ku disiplina i ban demostrá ku nos ta yu di Kòrsou. Ban purba alsa nos nivel na lo máksimo komo deportista.