Soraida ‘Aida’ Juliana

Soraida ‘Aida’ Juliana

Nase dia 18 di Yüli di aña 1960

Kon (na ki edat) a kuminsá ku deporte

For di mucha chikitu Soraida tabata hunga beisbòl den kura di kas ku su rumannan i e rumannan Clarcke tabata bin hunga den kura di kas di Soraida su hendenan. Sylvia Clarcke ta esun ku a bai ku Soraida na vèlt di Buena Vista. Na 1973, na edat di 13 aña, Soraida ta drenta e ekipo di Pichingolo kual por sierto e aña ei tambe a keda fundá. Na 1975 Soraida a kompetí den klase A i despues for di 1976 te ku dia e la retirá e la kompetí den klase AA. Despues Soraida a pasa pa coach den beisbòl little league i a biaha ku diferente selekshon pa eksterior komo coach.

Kua tabata logronan di mas grandi den deporte

Ku su klup Pichingolo Soraida a titulá 17 bia kampion den 18 aña logrando diferente título personal komo mihó bate, mihó sènterfilder i hungadó mas balioso i tambe logrando e tripel korona.

Ku selekshon di Antia Soraida a logra diferente premio i e logro mas grandi tabata e medaya di oro na e weganan ‘Centro Americano y del Caribe’ ku a tuma lugá na aña 1976 na El Salvador.

Na aña 2002  direktiva di Curacao Little League ta duna Soraida Julianan e máksimo rekonosementu i ta introdusí e liga Soraida Juliana pa muchanan di 8 te ku 16 aña.

Kua tabata e entrenadó, deportista i o dirigente ku mas impakto

Pa Soraida Juliana, su coach Taffy de Jongh, Wendley Bernardus i Cecil garcia, tabata esunnan ku a hasi hopi impakto riba dje i komo deportista tabata e pelotero Rishinel Daal su forma di hunga beisbòl, semper a impreshoná Soraida Juliana.

Kua tabata e desepshon di mas grandi den deporte

E desepshon di mas grandi pa Soraida Juliana tabata na aña 1987, ora ku pichingolo a pèrdè su título di kampion. No pasobra nan a pèrdè e titulo, sino mas bien, pa e forma ku kos nan a bai i ku nan a pèrdè esaki. Esaki sigur tabata un desepshon grandi pa Soraida Juliana.

Kua tabata e satisfakshon di mas grandi den deporte

E satisfakshon di mas grandi tabata na aña 1988 ora ku dilanti su públiko e por a hunga e weganan di ‘Centro Americano y del Caribe’ Soraida a bari ku tur premio praktikamente. E úniko premio ku e no a logra tabata esun di kampion Picher debí ku e no a picha den e torneo.

Un konseho na nos hubentut pa loke ta deporte

E mensahe di Soraida Juliana na hubentut ta pa hasi tur kos ku disiplina. Tur loke ku bo ta hasi , hasié ku un meta i hasié bon. Desaroyá bo mes den loke ku bo ta bon den dje, no ta nos tur tin e mesun talento di ta un bon deportista, p’esei abo ku a haña un regalo di Dios di ta un bon deportista, hasi bon uso di e bon
talento ku bo tin. Ser un bon ehèmpel pa otronan tantu riba tereno komo pafó di tereno.