Nase 24 di Yüni di aña 1945

Kon (na ki edat) a kuminsá ku deporte

Na edat di 12 pa 13 aña Wendell Prince a kuminsá ku atletismo, ora ku su tata a hib’é stadion di Rif i a lag’e práktika atletismo. Despues di a bai Hulanda pa estudio, Wendell a kontinuá den e deporte, pero a sinti mas pa yuda otro deportistanan i asina e ta tuma e desishon pa drenta e mundu di coach.

Kua tabata logronan di mas grandi den deporte

Un logro grandi pa Wendell ta e echo ku praktikando atletismo na Hulanda, kaminda e tabata kompetí den 100m, 200m, 400m, 4x100m i 4x400m, e la yuda su ekipo V&L-TC- Den Haag logra e di dos lugá den ‘hoofdklasse’ i a kompetí rònt Hulanda ganando eksperensia komo koredó. Esaki a pone tambe ku Wendell a disidí ku ora e bin bèk Kòrsou e lo ke ta un coach pa yuda e otro atletanan ku su konosementu ku e la atkirí durante su estadia na Hulanda.

Komo Coach e ta trein masha hopi atleta i kada resultado positivo ku nan logra ta un logro importante pa Wendell tambe. Wendell a coach atletanan manera entre otro Jairo Duzant, Nathaniel Esprit, Churandy Martina Brian Mariano, Ethwinson Luis, Hensley Paulina i diferente mas.

Kua tabata e entrenadó, deportista i o dirigente ku mas impakto

Pa Wendell e coach merikano di e universidat di Illinois, kende ta Dr. John Stotlar, a hasi hopi impakto riba dje. Tabata tantu komo atleta i tambe despues ku Wendell a bira coach, John Stotlar tabata sostené Wendell i esaki a krea un laso di amistat sumamente bunita.

Kua tabata e desepshon di mas grandi den deporte

E desepshon di mas grandi pa Wendell tabata na 2008, den e final di 200 meter di e weganan olímpiko di Beijing, na momentu ku ora tur hende tabata selebrá e echo ku Churandy Martina a gana medaya di plata, despues di basta ratu ta deskualifike pa e echo ku e la trapa riba e liña. E desepshon hopi grandi pa Wendell ta e echo ku no a deskualifiká Churandy mes ora, pero ta a base di un reklamo di Merka, e ofisialnan a bin deskualifiká Churandy Martina ku a keda sin e medaya di plata.

Kua tabata e satisfakshon di mas grandi den deporte

E satisfakshon pa Wendell Prince ta mira su atletanan progresá i desaroyá di un forma positivo i logra nan metanan i nan soñonan ku nan ta buta nan dilanti

Un konseho na nos hubentut pa loke ta deporte

Wendell su konseho na tur atleta ta pa buta un meta nan dilanti. Ku trabou duru i perseveransia nan lo logra nan meta. Sigui bo soño, ni maske kiko pasa, no entrega, bin bèk i sigui pa bo soño.