Wendley ‘Chapè’ Bernardus

Wendley ‘Chapè’ Bernardus

Nase dia 06 di Febrüari di aña 1956

Kon (na ki edat) a kuminsá ku deporte

Wendley Barnardus a praktikamente nanse den deporte mirando ku su mayornan i rumannan tur tabata praktiká deporte i for di su 8 aña e ta aktivo. Wendley a praktiká vòlibòl, tènis, futbòl, basket i diferente otro deporte. Pero na un edat mas grandi e la disidí di skohe pa e deporte di beisbòl i esaki a bira su deporte mas práktika i simultaniamente algun tempu despues, e la a kuminsá coach den sòftbòl ku e ekipo di Pichingolo.

Kua tabata logronan di mas grandi den deporte

Wendley Baernardus tabatin hopi logro tantu komo pelotero komo coach. Komo pelotero e logro di mas grandi tabata na aña 1979, na momentu ku e la titulá kampion pa promé bia ku e ekipo di Royal Scorpions. Nan tabata atras den e seri i a sa di bin bek pa gana e seri 3-2. E di dos ku beisbòl tabata na aña 1982 den stadion di SDK, ku mas di 13 mil fanátiko ku a paga pa mira un wega di beisbòl.

Den Sòftbòl e tin masha hopi título komo coach di Pichingolo kuminsando for di aña 76 ku nan a bira kampion i tabata praktikamente den tur final di nos kampionato di sòftbòl.

Kua tabata e entrenadó, deportista i o dirigente ku mas impakto

Pa Wendley Bernardus Taffy De Jongh ta un persona ku a hasi hopi impakto riba dje. Taffy sigur ta mas ku un entrenadó, e ta un edukadó, e ta forma hende, e ta motivá bu i e ta forma bu pa bo por ta un bon hende den nos sosiedat.

Kua tabata e desepshon di mas grandi den deporte

E desepshon di mas grandi tabata na aña 1978, hungando pa e ekipo di Royal Scorpions, algun ekipo a hiba un kaso sivil kontra di e ekipo Royal Scorpions debí ku esakinan a uza dos pelotero ekstranhero den e enkuentronan i tabata promé bia ku Royal Scorpions ta kai for di playoff. Danki Dios nan no a uza e peloteronan aki henter temporada, sino e ekipo di Royal Scorpions lo a degradá. Tabata e aña tambe ku e tremendo pelotero Willy Pietersz a fayesé den un aksidente outomobilístiko. Pues sigur un aña hopi duru.

Kua tabata e satisfakshon di mas grandi den deporte

E satisfakshon di mas grandi tabata na Bahamas, den weganan hubenil di sòftbòl na 2001, e ekipo di Kòrsou ku apénas 10 hungadó ta sa di konkista medaya di oro. Tabatin un mal komprondementu den e fecha di nasementu ku por a partisipá i esaki a pone ku 9 hungadó no por a partisipá den e torneo. Pero ku e 10 hungadónan aki Wendley komo mènedjer a sa di bataya pa logra e título máksimo.

Un konseho na nos hubentut pa loke ta deporte

Ora bo ta hasi deporte, bo mester tin disiplina i si bo ta gusta bo deporte, bai pe i dediká na dje. Sòru di respetá tur hende, respetá bo kontrinkante, pero e punto mas importante ta traha duru pa bo logra bo meta.

Un meta no ta simplemente gana un wega, esei ta djis un resultado. Soru pa bo ta un modelo pa otronan i un ehèmpel pa bo pais.